Nyota wa Juventus matatani huko Chile.

 

Kiungo wa klabu ya Juventus na timu ya taifa ya Chile Arturo Vidal amekumbwa na mkasa ambao atapenda kuusahau haraka iwezekanavyo wakati akiwa na timu yake ya taifa ambayo kwa mwaka huu imekuwa mwenyeji wa michuano ya Copa America.

Vidal ambaye amekuwa kwenye kiwango bora tangu kuanza kwa michuano hiyo akiwa amefunga mabao matatu kwenye mechi mbili amehusika kwenye ajali ya gari ambayo imeelezwa kuwa yeye mwenyewe ndio alikuwa chanzo cha ajali hiyo .

 

Vidal akiwa anaingia kwenye mazoezi ya timu ya taifa ya Chile akiwa na gari yake ambayo alipata nayo ajali jana.

Ripoti ya jeshi la polisi inasema kuwa Vidal alikuwa amelewa wakati akiwa anaendesha gari aina ya Ferarri na alisababisha ajali ambayo ilimsababishia majeraha madogo sambamba na mkewe .

Wote wawili waliwahishwa hospitalini ambako wamekuwa wakitibiwa huku hali zao zikielezwa kuwa si mbaya kutokana na kupata majeraha madogo kwenye ajali hiyo .

 

                                  Gari la Vidal likiwa kwenye hali mbaya baada ya ajali .

Vidal alikuwa akitoka kwenye klabu moja ya usiku baada ya wachezaji wa Chile kupewa ruhusu ya kuondoka kambini baada ya mchezo wao dhidi ya Mexico.

Ripoti zaidi zinasema kuwa Vidal huenda akafukuzwa kambini ikiwa ni moja ya hatua za kinidhamu toka kwa kocha wa timu ya taifa ya Chile Jorge Sampaoli.

 

 Nyota huyu anatarajiwa kupandishwa mahakamani hivi karibuni kujibu mashtaka ya kuendesha gari akiwa ametumia kilevi na tayari ameporwa leseni yake .